दिपेश न्यौपाने नुवाकोट , ककनी गाँउपालिकाका अध्यक्ष तामाङले ककनी बासिन्दाहरूलाई रोजगारमुखी बनाउनका लागी विभिन्न नीति तथा कार्यक्रम ल्याउनुपर्ने बताउनुभएको छ ।
गाँउपालिकाले आयोजना गरेको रोजगार सेवा केन्द्रले कार्यक्रममा आफ्नो धारण राख्दै ककनीबासीलाई आत्मनिर्भर बनाउन पासाङल्हामु राजमार्ग प्रमुख मेरुदण्ड भएको स्पष्ट पार्नुभयो । विगत ९ बर्ष देखि ठेकेदारको लापरबाहीले अलपत्र रहेको यस राजमार्ग निर्माणका लागी केन्द्र सरकार सँग पहल गरिने बताउनुभएको छ ।
लामो समयदेखी विभिन्न कारणले निर्माण कार्य अलपत्र पर्दा ककनी गाउँपालिकाका आर्थिक ,सामाजिक ,शैक्षिक ,स्वास्थ्य र कृषि क्षेत्र ओझेलमा परेको अध्यक्ष तामाङले बताउनु भयो।
रोजगार सेवा केन्द्र कार्यक्रम मार्फत ककनीलाई आत्मनिर्भर बनाउने लक्ष्य रहेको उहाँले बताउनु भयो ।
अधिकांश ग्रामिण भू भाग रहेको यस गाउँपालिकामा कृषि र पर्यटकिय क्षेत्र प्रचुर मात्रामा रहेको छ । यस गाउँपालिकामा व्यवसायिक रुपमा रेम्बो ट्राउट माछा, किबि र स्टाबेरी खेती गरिन्छ । यहाँको ट्राउट माछा लोक प्रिय रहेको छ । त्यसैले यस क्षेत्र ट्राउट राजमार्गको रुपमा पनि चर्चित रहेको छ ।
यस गाउँपालिकाका कृषकले आलु, मुला लगाएतका तरकारी खेती उत्पादन गर्ने गर्दछन् । सोहि मार्फत अधिकांश कृषकले आफ्नो जीविकोपार्जन गर्ने गर्दछन् ।
व्यवसायिक रुपमा यहाका अधिकांश कृषकहरु स्टाबेरी खेती गर्दै आएका छन् । स्थानिय तह आए संगै यस गाउँपालिकामा धेरै परिर्वतनहरु आएका छन् । विकास निर्माणको कार्यले गति लिएको छ । सडक विस्तार देखि स्तरउन्नति, ग्रावेल, ढलान लगाएतको काम भएका छन् ।
कृषकहरुको व्यवसायिक उन्नतिको लागि कृषि तालिम, अभिमुखिकरण तालिम लगाएतका कामहरु प्रशस्त मात्रामा भएका छन् । जसले कृषकले परम्परागत रुपमा गर्दै आएका खेति प्रणाली भन्दा फरक र आधुनिक शैलीबाट खेती गर्दा मनग्य आम्दानी गरिरहेका र आगामी झन उत्पादनमा वृद्धि हुने गरी नीति तथा कार्यक्रम ल्याउने अध्यक्ष तामाङले बताए ।
कार्यक्रममा बोल्दै गाँउपालिकाकी उपाध्यक्ष मिठ्ठु माया लामाले गाउँपालिका भित्र बेरोजगारहरूको संख्या संकलन गरि रोजगारीका अवसर जुटाउन प्रधानमन्त्री स्वरोजगार कार्यक्रमलाई प्राथमिकतामा राखिने बताइन् । यसैगरी, वडा नम्बर ८ का अध्यक्ष शेषमान लामाले दिगो विकासका अवधारणा अनुसार सडक निमार्ण कार्यमा प्राथमिकता दिनुपर्ने बताउनु भयो।
श्रम रोजगार तथा सामाजिक सुरक्षा मन्त्रालयका बिज्ञ युवराज बस्नेतले सहजीकरण गर्नुभएको कार्यक्रममा स्थानिय जनप्रतिनिधि, वडा सचिव, कार्यपालिकाका कर्मचारी , सरोकारवाला र स्थानीय पत्रकारहरूको सहभागिता थियो । 
